حكايات مني السيد حصري أمي جاتلي في عز الحر، شايلة شنط الخير وجايبة سكر وسمنة بلدي عشان تسندني أنا وعيالي ... حماتي شافت السكر، أخدته وادته لسلفتي، ولما طلبت حقي أنكرت وقالت إني بتبلى عليها! بس اللي حصل بعد كده كان صدمة أمي كانت طالعة على السلم نَفَسها مقطوع، وشايلة في إيدها خير ربنا كله، شنط تقيلة متبهدلة بيها في المواصلات عشان تيجي تفرحني وتخفف عني وعن عيالي شوية من حمل الدنيا ومصاريفها اللي ما بترحمش.
كان من ضمن الحاجة برطمان سمنة بلدي ريحته ترد الروح، ومعاه خمس أكياس سكر أبيض زي الفل.. دخلت رصيت الحاجة على الرخامة وبوست إيدها ودعيت لها إن ربنا يخليها لي ويبارك في عمرها هي وأبويا، ناس شقيانة عشان تسندنا، ومش عارفين إن الخير ده فيه عيون تانية مستنياه على الباب.
حكايات_مني_السيد أمي لسه ما لحقتش توصل أول الشارع، ولقيت الباب بيخبط، حماتي دخلت، عينيها لفت في المطبخ لقطت الرخامة في ثانية ما شاء الله، أمك جايبة لك سمنة وسكر يفرّقوا على بلد، بس السكر كتير ده كله يا بطة!
رديت بنية صافية والله يشهد ربنا يخليها لي يا حماتي، برطمان السمنة هشيله للعيال، بس أنا أصلاً عندي سكر من الشهر اللي فات، فكنت بقول هاخد الخمس أكياس سكر أبدلهم من البقال بمكرونة عشان محتاجاها للغدا. بصت لي بنظرة مفهمتهاش ساعتها وقالت وعلى إيه تروحي للبقال وتتعبي نفسك؟
قلت لها بحساب بسيط الكيس ب 25 والمكرونة ب 26، هزود خمسة جنيه على الخمسة كيلو وأجيب اللي البيت محتاجه. قامت لاقطة شنطة السكر في إيدها وسابت برطمان السمنة، وقالت من غير كلام خلاص ما تروحيش ولا تتعبي نفسك، أنا هاخد السكر ده وأجيب لك مكانه خمس أكياس مكرونة من عيني الاتنين.
فات أول أسبوع، والتاني، والتالت.. وأنا مستنية، وكل ما أسألها تقولي بكرة أجيب لك، بعده هبعت لك، لحد ما اتفاجئت بالصدمة الأولى الخمسة كيلو سكر طلعوا من بيتي وراحوا في حجر سلفتي عيني عينك! بلعتها وسكت، قلت يمكن مأزومة وحماتي هتتصرف وتجيب لي المكرونة، لحد ما جه يوم ما كانش عندي عشا للعيال، نزلت لها بإحراج يا حماتي معلش، المكرونة بس عشان أعمل للعيال حاجة ياكلوها.
حصري على صفحة روايات و اقتباسات. طلعت لي كيسين اتنين بالعافية وقالت لي ببرود خدي دول وسلفتك أول الشهر مع التموين هتجيب لك التلاتة الباقيين. عدت الأيام، وجه أول الشهر، نزلت أسألها بالراحة يا حماتي، المكرونة الباقية وصلت؟
لقيتها بتبص لي من فوق لتحت وبتقول بنبرة نشفت دمي مكرونة إيه يا روح أمك؟ اتسمرت مكاني مكرونة إيه؟! المكرونة اللي أخدتي قصادها خمس أكياس سكر بتوع أمي! ردت والابتسامة باردة على وشها أنا؟ أنا ما أخدتش منك حاجة أصلاً، إنتي هتتبلي عليا في شيبتي؟
الدنيا لفت بيا، الدم غلي في عروقي، إزاي؟! واخدة السكر من شقتي قدام جوزي وعيالي! ولما قولت لها الكلام ده، اتحدتني بعين وقحة طب اندهي ابني ووريني هيقول إني أخدت ولا لا! من حرقة قلبي على شقى أهلي اللي بيتاكل ويتبدل بالباطل، رفعت إيدي لربنا وقولت بصوت بيترعش من القهر حسبي الله ونعم الوكيل، وكفى بالله حسيبًا!
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.